मराठा समाजातील ३५० आंदोलनकर्त्या विरुद्ध गोंदी पोलीस ठाण्यात गुन्हा दाखल

शहागड प्रतिनिधी :- उपोषणकर्ते मनोज जरांगे पाटील यांची प्रकृती खालावल्याने वैद्यकीय सल्ल्यानुसार त्यांना रुग्णालयात घेऊन जात असताना हुज्जत घालून पोलिसांवर दगडफेक करणाऱ्या ३५० आंदोलकांवर गोंदी पोलिस ठाण्यात गुन्हा दाखल करण्यात आला आहे. अंबड तालुक्यातील आंतरवाली सराटी येथे मराठा समाजाला आरक्षण देण्यात यावे, या मागणीसाठी मनोज जरांगे पाटील यांचे उपोषण सुरू होते. उपोषणा दरम्यान मनोज जरांगे पाटील यांची प्रकृती खालावल्यामुळे वैद्यकीय सल्ल्यानुसार त्यांना रुग्णालयात दाखल करण्यासाठी पोलीस घेऊन जात होते. त्यावेळी आंदोलकांनी पोलिसांशी हुज्जत घालून जरांगे पाटील यांना रुग्णालयात घेवून जाण्यास प्रतिकार करून पोलिसांवर दगडफेक करून पोलिसांना गंभीर जखमी केले आहे. तसेच, पोलिसांची एक कार जाळून टाकली आहे, असे फिर्यादीत नमूद करण्यात आले आहे. पोलीस उपनिरीक्षक गणेश राऊत यांच्या फिर्यादीवरून ऋषिकेश बेंद्रे, श्रीराम कुरणकर, राजू कुरणकर, संभाजी बेंद्रे, महारुद्र अंबरुळे, राजेंद्र कोटुंबे, भागवत तारख, दादा घाडगे, पांडुरंग तारख, अमोल पंडित, किरण तारक, अमोल लहाने, वैभव आवटे, किशोर कटारे, अविनाश मांगदरे, मयूर आवटे यांच्यासह ३०० ते ३५० आंदोलकाविरुद्ध गुन्हा दाखल करण्यात आला आहे. भादंवि ३०७, ३३३,३३२, ३५३,४२७, ४३५, १२० (ब), १४३, १४७, १४८, १४९ मुंबई पोलीस कायद्याचे कलम १३५ आणि सार्वजनिक मालमत्ता नुकसान प्रतिबंधक अधिनियम कलम ३ अन्वये गुन्हा दाखल करण्यात आला आहे. या गुन्ह्याचा तपास सहाय्यक पोलीस निरीक्षक प्रदीप एकशिंगे करीत आहेत.